WASANII si masikini-DC Mkuranga

Wasanii wa TOT waahidi kujenga nyumba zao haraka Na Mwandishi Wetu, Mkuranga  MKUU wa Wilaya ya Mkuranga, Abdallah Kihato amewataka wasanii kuacha tabia ya kukata tamaa kuwa wao ni masikini kwa vile vipaji walivyonavyo wakivitumia vizuri ni utajiri mkubwa katika maisha yao. Akizungumza katika sherehe za kukabidhi nyumba 25 za wasanii wa kijiji cha Mwanzega, Mkuranga mkuu huyo wa wilaya alisema wasanii wamekuwa wakijiiita masikini lakini ukweli ni kwamba vipaji walivyonayo ni utajiri mkubwa kwao na taifa zima. Alisema vipaji walivyonavyo vya kuelimisha jamii kutumia sanaa na kuburudisha ni utajiri ambao kama utatumiwa vizuri hakuna msanii atakayejiona masikini mbele ya jamii. "Mimi ni mwamuzi wa soka niliyesomea kazi hiyo pia ni msanii mwenzenu ninayefuatilia kazi za sanaa za kila siku za watanzania, nimewahi kufanya mengi katika sanaa pia niliwahi kuchezesha mechi ya Simba na Yanga kwenye uwanja wa Karume miaka ya zamani lakini purukushani zake zilifanya nisichezeshe tena" alisema Mkuu wa Wilaya Kihato. Alisema kijiji cha Wasanii Mwanzega kina kiloa sifa za kukifanya kiwe cha nyumba za asili kama kivutio cha watalii kutoka nje ya nchi na kuwataka viongozi wa SHIWATA kuandaa tamasha kubwa la wasanii wa fani zote kijijini Mwanzega. Kihato alisema Serikali iko tayari kutoa mchango wake katika tamasha hilo ambalo alisema kama likitangazwa vizuri wasanii na watanzamaji kutoka sehemu mbalimbali za dunia watafika kijijini kuhudhuria na kuona vivutio vilivyopo. Mkuu huyo alisema amesikia kilio cha wanakijiji hao cha kuomba wapatiwe umeme, maji na barabara na kuahidi kuwa Serikali iko tayari kutekeleza hilo kama wasanii na wanakijiji wa Mwanzega watawasilisha maombi yao. Awali Mwenyekiti wa SHIWATA, Cassim Taalib alisema kijiji wasanii Mwanzega mpaka sasa kimekwisha kujenga nyumba 150 kwa njia yawanachama kujichangisha. Katika sherehe hizo zilizosindikizwa na burudani ya kikundi cha matarumbeta cha eEbeneza cha Manzese, Dar es Salaam, wachezaji maarufu wa zamani wa Yanga, Salvatory Edward na Kipa HAmisi Kinye walikabidhiwa nyumba zao. Wasanii wengine waliohudhuria sherehe hizi ni Kikundi cha Tanzania One Theatre (TOT) wakiongozwa na Ali Stars na Abdul Misambano ambao nao waliahidi kuanza ujenzi kwa njia ya kuchangishana katika kijiji hicho. SHIWATA yenye wanachama zaidi ya 8,300 inamiliki hekari 300 za kujenga nyumba za makazi katika kijiji cha Mwanzega na hekari 500 za kulima mazao mbalimbali katika kijiji cha Ngarambe, Mkuranga mkoani Pwani. mwisho