TRA YASEMA KUFICHA FEDHA NNJE KUNAIKOSESHA MAPATO.

KAMISHNA Mkuu wa Mamlaka ya Mapato nchini (TRA), Harry Kitilya pichani, amesema kuwa kitendo cha wananchi kuficha fedha katika mabenki ya nje kinaikosesha serikali mapato.

Akizungumza katika semina ya waandishi wa habari juu ya uelewa wa vitendo vya udanganyifu vinavyofanyika nchini, Kitilya alisema kuwa iwapo fedha hizo zingeweza kuhifadhiwa nchini serikali ingeweza kukusanya kodi kupitia fedha hizo.

Mbali na hilo, Kitilya alisema kuwa kutokana na kuwepo kwa vitendo vya udanganyifu hadi sasa taifa linapoteza asilimia 5 ya pato la taifa kila mwaka.

Kamishna huyo alisema kuwa kiasi cha dola trilioni 3.5 kilipotea duniani kwa njia ya udanganyifu katika kipindi cha mwaka jana kutokana na shughuli mbalimbali kufanywa kwa mitandao.

“Jambo hilo ni janga kwa taifa kwa kuwa linafanyika katika maeneo mbalimbali ikiwa ni pamoja na uhasibu, ununuzi, uuzwaji na hata katika eneo la ukusanyaji kodi, huko ndiko kumekuwa na tatizo kubwa,” alisema.

Kitilya aliongeza kuwa ndani ya mamlaka hiyo wamekuwa wakipata matatizo makubwa hasa katika uingizaji wa magari na leseni, kwani wezi hao wamekuwa wakiandaa nyaraka bandia ambazo zinakuwa na mihuri ya mamlaka hiyo.

Alitaja maeneo mengine kuwa ni pamoja na taasisi za kifedha, zikiwemo benki ambapo wezi wanaweza kuingiza nyaraka bandia na kuchukua fedha pasipo wahusika kubaini.

Kitilya aliitaka jamii kuwa makini na kutosita kutoa taarifa ili wahusika hao waweze kukamatwa na kufikishwa katika vyombo vya sheria.

“Nyinyi waandishi mna kazi kubwa katika hilo, ni muhimu mkikutana na vitendo hivyo mkaviweka wazi ili viweze kujulikana na kuzuiwa visijitokeze,” alisema.

Naye Mwenyekiti wa Bodi ya Tanzania Chapter, Lusekelo Mwaseba, alisema kuwa hadi sasa ripoti mbalimbali zimefanyika duniani ili kubaini ukubwa wa tatizo hilo ambapo kwa hapa nchini makampuni matano yalifanyiwa utafiti katika kipindi cha mwaka 2011.

Alisema kwa sasa wanashughulikia eneo la afya ambapo kuna udanyanyifu unaofanywa na baadhi ya watu wakitumia huduma za kiafya pasipo kuwa wanachama halali.Tanzania Daima.