NCHI TISA KUSHIRIKI ROCK CITY MARATHON 2012 OKTOBA 28

 Nembo ya Mbio za Rock City Marathon 2012, ikionesha wadhamini wa mbio hizo kwa mwaka huu.

Mwenyekiti wa Baraza la Michezo Tanzania, Dioniz Malinzi (wa tatu kushoto) akiwa katika picha ya pamoja na baadhi ya wawakilishi wa wadhamini wa mbio za Rock City Marathon 2012, wakifuatilia uzinduzi wa maandalizi ya mbio hizo uliofanyika kwenye Hoteli ya New Afrika. Rock City Marathon zitafanyika Oktoba 28 kwenye Uwanja wa CCM Kirumba jijini Mwanza Oktoba 28.

Ofisa Uhusiano wa Kampuni ya Airtel Tanzania, Jane Matinde (kulia) akimkabidhi hundi ya shilingi milioni 5, Meneja Matukio wa Kampuni ya Capital Plus International ambaye pia ni Mratibu Rock City Marathon 2012, Grace Sanga jijini Dar es Salaam hivi karibuni kama sehemu udhamini wa mbio hizo zitakazofanyika kwenye Uwanja wa CCM Kirumba jijini Mwanza Oktoba 28 Oktoba. Airtel pia walikabidhi fulana 400 zitakazotumika katika mbio hizo.

 Mkali wa Bongo Flava Juma Kassim 'Sir Nature' (katikati) akiimba na Baby Madaha kutambulisha shoo yao kali itakayofanyika sambamba na mbio za Rock City Marathon 2012. Kushoto ni Mratibu wa mashindano hayo, Grace Sanga, wa Kampuni ya Capital Plus inayoandaa mashindano hayo.

DAR ES SALAAM, Tanzania

 

JUMLA ya nchi tisa zinatarajiwa kushiriki katika mbio za kilomita 21 za Rock City Marathon 2012, zilizoandaliwa na Kampuni ya Capital Plus International (CPI), zitakazofanyika Jumamosi Oktoba 28 kwenye Uwanja wa CCM Kirumba jijini Mwanza.

Akizungumza na Tanzania Daima jijini Dar es Salaam leo, Mratibu wa mbio hizo Grace Sanga wa CPI, alizitaja nchi hizo kuwa Kenya, Uganda, Rwanda, Burundi, Jamhuri ya Kidemokrasia Congo (DRC), Australia, India, Canada na Marekani, huku akidokeza maandalizi mazuri yamechangia ongezeo la washiriki.

“Tumetuma mialiko ya kushiriki kwa wadau wote wa riadha wa nchi jirani ili wapate kushiriki Rock City Marathon 2012, ndio maana tunategemea kupata washiriki wengi zaidi kutoka nje ya nchi, kulinganisha na mwaka uliopita na maboresho ya mbio hizi yatachangia kuongeza ushindani,” alisema Grace.

Sanga aliongeza kuwa, mbio hizo za kila mwaka zimegawanywa katika makundi matano ya mbio za kilomita 21 kwa wanawake na wanaume, kilomita tano kwa watu wote, kilomita tatu kwa walemavu, kilomita tatu kwa wazee kuanzia miaka 55 na kilomita mbili kwa watoto wa kati ya miaka saba hadi kumi.

Rock City Marathon zilianzishwa mwaka 2009, ambapo mwaka huu ziko chini ya udhamini wa NSSF, Airtel Tanzania, Geita Gold Mine, Shirika la Ndege Tanzania (ATCL), PPF, African Barrick Gold, New Africa Hotel, Nyanza Bottles, New Mwanza Hotel, TANAPA na Bodi ya Utalii Tanzania (TTB).

Mbio hizo zinazosubiriwa kwa hamu na wakazi wa Kanda ya Ziwa, zitapambwa na burudani ya aina yake kutoka kwa nyota wa muziki wa kizazi kipya nchini Juma Kassim ‘Sir Nature’, ambapo zitaanzia kwenye Uwanja wa CCM Kirumba kupitia njia tofauti na kurudi uwanjani hapo.

Aidha, Sanga alisema kuwa, pesa itakayopatikana kutokana na ada ya usajili wa washiriki unaofanyika kwenye Uwanja wa Nyamagana jijini Mwanza, Ofisi za Capital Plus zilizopo jengo la ATC ghorofa ya tatu na kwenye blog ya rockcitymarathon.blogspot.com zitapelekwa katika mfuko wa msaada kwa watu wenye ulemavu waishio jijini Mwanza.