MWENDA BLOG

Sunday, 15 April 2012

MAN UNITED YACHINJA, YAPAA ENGLAND

Rooney na Wellbeck

KLABU ya Manchester United imejiimarisha kileleni mwa Ligi Kuu ya England, kufuatia ushindi wa mabao 4-0 dhidi ya Aston Villa kwenye Uwanja wa Old Trafford, Manchester.

Hadi mapumziko, Man United walikuwa mbele kwa mabao 2-0, yaliyotiwa kimiani na Wayne Rooney kwa penalti dakika ya saba na Danny Welbeck dakika ya 43.
Rooney aliwainua tena vitini mashabiki wa Man U dakika ya 73 alipofunga bao la tatu na Nani akafunga la nne dakika ya 90.
United sasa ina pointi 82, baada ya kucheza mechi 34, sawa na wapinzani wao Man City wenye pointi 77.
Arsenal ni ya tatu kwa pointi zake 64, Spurs ya nne kwa pointi zake 59 sawa na Newcastle ya tano, wakati Chelsea yenye pointi 57 ni ya sita.

POLISI YAKATAA KICHAPO CHA MGAMBO

Fainali ya 9- Bora ya Ligi Daraja la Kwanza (FDL) kuwania tiketi za kucheza Ligi Kuu ya Vodacom (VPL) msimu ujao imeendelea kushika kasi leo (Aprili 15 mwaka huu) kwenye Uwanja wa Jamhuri, mjini Morogoro kwa Mgambo Shooting ya Tanga kuvutwa shati.
Mgambo Shooting ambayo hadi kabla ya mechi za leo (Aprili 15 mwaka huu) ilikuwa ikiongoza kwa pointi 11 imelazimishwa sare ya mabao 2-2 na Polisi Tabora ambayo hadi kipindi cha kwanza kinamalizika ilikuwa mbele kwa mabao 2-0.
Mabao ya Polisi Tabora yalifungwa dakika ya tano na Ernest Nkandi kwa shuti kali lililomshinda kipa Kulwa Manzi. Keneth Masumbuko aliifungia Polisi Tabora bao la pili dakika ya 40.
Mgambo Shooting inayofundishwa na beki wa zamani wa Taifa Stars, Joseph Lazaro ilikianza kipindi cha pili kwa nguvu na kufanikiwa kupata bao dakika ya 58 lililofungwa kwa shuti kali nje ya eneo la hatari na Salum Kipaga.
Dakika saba kabla ya filimbi ya mwisho, Juma Mwinyimvua aliipatia Mgambo Shooting bao la kusawazisha akimalizia pasi ya Fully Maganga kutoka wingi ya kushoto.
Fainali hiyo inashirikisha timu tisa ambapo tatu za kwanza zitafuzu kucheza VPL msimu ujao. Timu nyingine zinazoshiriki ligi hiyo ni Rhino Rangers ya Tabora, Trans Camp ya Dar es Salaam, Mbeya City, Tanzania Prisons ya Mbeya na Mlale JKT ya Ruvuma.

SIMBA WATAKATA, YANGA WACHAKAZWA

Mafisango aliyebebwa juu

SIMBA SC wamejiimarisha kileleni mwa Ligi Kuu ya Vodacom Tanzania kufuatia ushindi wa 1-0 jioni hii kwenye Uwanja wa Taifa, Dar es Salaam, dhidi ya Ruvu Shooting.

Shukrani kwake kiungo wa kimataifa wa Rwanda, Patrick Mutesa Mafisango aliyefunga bao hilo pekee dakika ya 80.

Simba sasa ina pointi 53, tatu zaidi dhidi ya azam FC inayoshika nafasi ya pili.

CCM KIRUMBA MWANZA

Katika mchezo mwingine wa Ligi Kuu, kwenye Uwanja wa CCM Kirumba mjini Mwanza, wenyeji Toto African walifanya kile ambacho hakikutarajiwa na wengi.

Toto wamewafunga ‘baba zao’ Yanga mabao 3-2 kwenye Uwanja wa CCM Kirumba, Mwanza.

Mabao ya Toto inayopigana kuepuka kushuka daraja, yalitiwa kimiani na Mussa Said aliyefunga mawili dakika ya 18 na 39, Kulwa Mobbi dakika ya 24 Iddi.

Hamisi Kiiza aliifungia Yanga mabao mawili dakika ya 43 na 65.

Yanga inabaki na pointi zake 46 katika nafasi ya tatu, dhahiri sasa inaelekea kupoteza matumaini ya kutetea ubingwa wake wa Ligi Kuu.

Kocha Mserbia, Kosradin Papic alizomewa na mashabiki wa Yanga mjini Mwanza kutokana na kiwango kibovu ambacho timu hiyo inacheza hivi sasa.

Kipigo cha leo kinamaanisha Yanga imepoteza mechi mbili mfululizo, kwani mechi iliyopita na Coastal Union mjini Tanga, japokuwa walishinda 1-0, lakini walipokonywa pointi hizo na Kamati ya Ligi Kuu.

AZAM, CHAMAZI, DAR ES SALAAM

Villa Squad nayo iliitandika Coastal Union ya Tanga mabao 4-2 kwenye Uwanja wa Azam, Chamazi.